Gym Cup Elgg, 3. Mai 2015
Pünktlich am 7.45 simmer in Andelfinge mit vollgstopfte Autos richtig Elgg ufbroche. Chum acho, hemmer oisi Muskle binere churze Jogging Runde ufgwärmt. S’Wetter isch leider nid ganz nach oisem Gusto xi. Ihpackt i Regehose –und Jagge hemmer ois uf d’Schlammschlacht vorbereitet. Da na chli meh spanne, det nachli höcher gumpe und au immer guet luege, dass mer nid us de Reihe tanzt - das sind d’Schwerpünkt bim Ihturne xi. Während enere churze Regepause hemmer ois s’erscht Mal ufem Feld parat gstellt. Die erscht Ernüechterig isch schnell cho, e langi Pause zwüsched em 1. und 2. Lied het ois all verunsicheret! Doch nach gfühlte 30s het den d’Christina Aguilera doch na usde Luutsprecher drönt. Miteme 8.79 hemmer derfe z’friede si. Aber jede vo ois het gwüsst, dass na meh dinelieht. Nachere lange, regnerische Mittagspause hemmer ois wieder i oisi nasse, liecht füechtelig stinkende Regechleider inetruckt. Husch na d’Manne go ahfüehre und den zagg zagg simmer scho wieder selber ufem Rase gstande. Dasmal leider mit Rege, defür mitemene flüssigere Übergang vode Lieder. Dreckig und usser Schnuuf hemmer oisi Gymnastikvorfüehrig beendet. Wieder kuschelig ihpackt hemmers ois im Feschtzelt gmüetlich gmacht. Am Schluss hets leider nu knapp nid ufs Podest glanget. Mitem 4.Platz und de Note 8.60 im zweite Durchgang simmer aber doch zfriede xi. Und will alli Verein ufem Podest nid us de Region sind, hemmer sogar na de Wanderpriis derfe mithei näh!