Turnfahrt, 27.-28. Juni 2015

Am 6.30h hemmer de Tag miteme Glas Hugo gstartet, gfolgt vomene Gipfeli und ere Vitaminbombe (Caprisonne). Doch Sehnsucht nach eme Kaffi isch bi de einte immer grösser worde, was d'Busabfahrsziite aber nid interessiert het. D'Susanne het sich das nid gfalle lah und "extra" 1 Station z'früeh druckt, woruf abe de Busfahrer froh gsi isch, wo mir denn bide Beatushöhle usgstiege sind. Oisi Reiseleiterin Susanne het ois professionell als ersts dur d'Höhli gfüehrt. Aber denn bi de Informationstafle 16 het sie mit Schrecke festgstellt, dass es Komma fählt. Liecht us de Bahn gworfe simmer wieter. S'Mondmilchgestein het ois zu neue Gschäftsideeä inspiriert. MMM - Mondmilchmoos. D'Heidi händ mir als ersti Probandin usgsuecht.
Am Bus nach Wilderswil hämmer in Interlake nur no vo hine chöne winke. Dank hilfsbereite Postautochauffeure sind mir doch na zum langersehnte Kaffi cho und händ s'Nostalgiebähndli uf di Schynigge Platte auna verwütscht. Nöd nur d'Landschadft, sondern au d'Nr. 8 het ois verzauberet.
Achtung fertig los - wer isch zerscht ufem Fuulhorn? Gmüetlich isches losgange, zwüsched ine hämmer d'Schneeschueh montiert und d'Aprikosewähe verpasst und strenger hets ufghört. Nach enere chline Erfrischig mit Gletscherwasser händ mir en ultratopsuper Znacht gnosse. Do wo isch s'Nr. 8? Damiter sim Name grecht wird, isch er Punkt 8i ide Hüttetüre gstande. Miteme Reeti und es paar Partie Elferaus händ mir de Abig usklinge lah.
Eigentlich hettemer ois gern mitere Chappe voll Schlaf gstärkt für de nächsti Tag. Wäg de klappernde Zääh isch das leider nid möglich gsi. 05.05h zwitschered scho de ersti Wecker. Über d'Hälfti het de Sunneufgang bestuunt. Mit Vollzähligkeit hämmer ersch bim warme Zmorge gstrahlt. Bim schönste Wätter hämmer de Abstige in Agfriff gno. D'Anita isch am tüüfste gsunke, da sie mit eim Bei inere "Fasch-Gletscherspalte" glandet isch. Mir händ si zum Glückwieder chöne befreie. Am Bachalpsee hämmer di churze Hose montiert und es Gläsli Wii degustiert. Bim First Flyer simmer froh gsi, dass mir scho es Gläsli Wii intus gha hend. Atemlos sind di einte miteme grosse Schreck im Schreckfeld acho. Dänn händ mir eus an Chnüütest gwagt. Durab, durab und na steiler durab het ois de Wäg nach Bort gfüehrt. Det hämmer uf Trottibikes umgsattlet. Ame friedliche Seeli hämmer oise Zmittag gnosse. Quietschend isches wiiter gange. De Anita ihre Bremse hend ois immer de Weg gleitet. Im Ziel Grindelwald acho häts en wohlverdiente Dessert gäh. Das Mal hämmer d'Aprikosewähe nid verpasst. Nachere wortwörtlich erstklassige Heifahrt sind alli 7 erschöpft dihei acho. Doch was isch echt mitem Nr. 8?

-> Bilder (wiiteri Bilder folged)

Viele Dank ad Susanne und Barbara Wegmann fürd Organisation vo dere super Turnfahrt!