Turnfahrt, 30. Juli - 1. August 2016
Gedicht von der Turnfahrt 2016
Samstag
Am Samschtig gats los
Gömmer ächt uf Davos?
Nei, das cha nöd si
Mir händ ja Euro däbi
Dä Carfahrer Andy begrüässt üs am achti
Doch üs hät niämer gseit, nämäd eu i achtig
Frisch, fromm, fröhlich, frei
Gömmer furt vo dihei
Mir started Richtig Schwarzwald
Am Zoll gits dä ersti Halt
Ä langi Pausä, än Gump vom Car
Und schowieder simmer startklar
Bim nörschte Halt döt stiegedmer us
Tamara und Dorine allnä vorus
Ä Wutachschluchtwanderig isch ahgseit
Än hufä Kilometer wird üsnä Füäss as Härz gleit
Am Zmittagshalt amänä schönä Örtli
Fieredmer üses Geburichind mit Gsang und äs paar Törtli
Wieter gats dä Wutach nah
Für die eintä wird’s zur Blag
D’Schuhä sitzäd nid bi allnä glich guet
Leider gits bi dä eintä Füäss sogar Bluet
Nach 5h laufe hämmer dä Wald verloh
Und schowieder staht dä Andy da
Wieter gats go degustiere
I dä Schnapsbrännerei dömmer alläs probiere
Äs nimmts zum Glück niämer vom Hocker
Aber dä Schnaps häts brucht, so nämädmer Carfahrt chli locker
Scho bim Abfahrä äs Missgschick
Dä Andy macht in Teer än Hick
Dä Herb vo dä Schnapserei
Isch alläg froh wenn dä Andy got hei
Ahcho am Schluchsee
Isch dän au scho snögschte gschee
Verwirrt vom Italiener fahrt dä Andy los
Ursi und Sabi sind am Gepäck uslade gross
Dä Ursi häts leider nümä glangäd
Und isch am fahrändä Car bliebä hangä
Nach äm duschä i dä Jugi sind ali wieder frisch
Was gits ächt guets zum Znacht uf dä Tisch
Doch s’ässä chunt nanig grad uf dä Tisch
Und gli sind nümä ali frisch
Di nörscht Carfahrt staht bevor
Ä Reis mit grosser Gfahr
Dä Wäg nid findä isch na eis
Doch mir fahräd so richtig im Scheiss
Über Brüggli mit Beschränkig vo 1 tonnä Gwicht
Mir chönd froh si wenn sie nid bricht
Au Kaffimaschinä flügt umänand
Uf därä Carfahrt passiert na allerhand
Trotz dänä 12 unheimliche Sachä
Simmer guet ahcho im Resti und lönds la krachä
Än heissä Stei hämmer gnossä
Gspielt, gsauät und gjassäd
Dank äm ruhige Taxi vom Schluchsee
Hämmer zobäd sBett ali na ganz gsee
dNachtruäh isch nid bi allnä glich gsi
aber än erläbnisrichä Tag gat verbi.
Sonntag
Mir gnüssed de Seeblick am Sunntig morgä
Ussert de Blattere hemmer kei sorgä
Velofahre isch d Überraschig
Und Pflicht isch nume wasserfeschti Chleidig
Dasses en Flyer wird gäh
Wüssed nur die wenigschtä
Gross isch d Vorfreud und d Erliechterig
Über die elektrisch Unterstützig
Mitem richtige Gang
Gats em Wald und See entlang
Mit biz Hilf und Gschickt
Isch schnell aus Velo gflickt
Vo wiitem hemmer s Wetter gsee
Konzentriert hemmer eus aber ufde See
Das het sich schnell gänderet
Wo di erschte Topfe ufde Helm hämmeret
Grösser worde isch de Tropfe zume Fluss
Und en See ide Schueh zum Schluss
Einzig es Tunnel git en Unterschlupf
Bide einte chunt scho de Schnupf
Vernünftig isches nöd zum wiiterfahrä
Drum mummer biz umplanä
E ganzi Rundi um de See
Hets immerhin gee
Troche und wider mit pfuus
Wichemer ufs Taxi uus
Mir fahred uf Hinterzartä
Wo de Ospelehof uf eus wartät.
De Hunger isch au ohni Velofahre uufcho
Drum gits es Buffet nachem aacho
Vo Würscht über Schinke zu Raclett
Landet alles uf eusem brett
Not macht erfinderisch
Das bewiist de Martin iidrücklich
Er zeigt eus woner sini Harfe schwingt
Und di voorig Molke id Tuube zwingt
Näbet bii no en Holzkurs bsueche
Und schwups staat en riise Stall womer chan bueche
Ideä glänzed i sinä Augä
Da chan mer sich ja direkt öppis abluegä
glii gats wiiter zum Badeparadis
Es het Lüüt als gäbts öppis gratis
S warme Wasser tut allne guät
D Ruschtbahn bruucht chli Muet
Drum schlürfed di einte en Drink
Die andere gönned sich ide Sauna en Augeblick
Alli sind gwärt und suuber
Nach Schluchsee zur Rückkehr
Chunt nöd druf ah öb Pfau oder Entä
Is Schiff gemmer go ässä
Es Filet mit Spätzle
Macht luscht uf meh Schwätzle
Mitem neue Lumumba im erwärmte Mage
Chan niemert über Hunger chlage
Zrugg ide Jugi
Gits nomal e spilrundi
au no zwei drü, sovill wemmer wänd
Bis d Augä vode letschte zue gänd
Montag
Am Mäntig ischs Programm na offä
Zämä hämmer ä gueti Wahl troffä
Stand-up-Paddling isch leider chli zchalt
Drum gömmer an Bahnhof und machäd än Halt
Ali Flyer sind leider scho usbueched
So hämmer schnäll ä neus Programm usgsueched
Seilpark, juhui, das wird gmacht
Doch di eintä händ Angst äs kracht
So gönd nu dHelfti in Action pur
Die andere gnüssäd ä Titisee-Städtlitour
So simmer ali wieder zämä am Mittag
Und mir gnüssäd üsä Lunch zum Zmittag
Äs wird plauderet und Chartä gschriebä
Für die armä Diheibliebnä
Leider gat üses Reisli scho bald z’Änd
Hoffentli hät dä neu Carfahrer chli gschicklicheri Händ
Äs isch dä Stefan im Moser Car
Und staht vor dä Jugi startklar
Ä ruhigi Heifahrt hämmer gnosse
Und au dä letschti Wy isch namal gflossä
Zum Glück hät dä Stefan erst gseit bim letschtä Halt
Dass bi ihm gester au fascht hät knallt
Glücklich und müäd chömedmer hei
Bi dä eintä sind dFüäss wiä Stei
So bliebt üs nuno dä Organisatore zdankä
Und dä Anita Meister für die gspändätä Frankä
Ä sauglatti Reis gat verbii
Si hett ruähig na chli lenger chönä sii
Applaus für diä super Reis
Uf dä nämädmer den mol no eis