Turnfahrt, 12.-13. Juli 2014

Sönd Wöllkomm!    

Am Samschtig, viel zfrüäh, simmer mit äm Zug id Turnfahrt gstartet. Z’Andelfinge hät sAbendtüür agfange. Voller Neugier simmer in Zug richtig Winti igstiege zum Anita, Tamara und Cornelia alias Patrizia abzhole. Doch öper hät gfählt. Cornelia. Leider isch ihrä Iphone-Wecker nid abä. Nach einiger Ziet und 2 Fläschä Wy simmer in Sammelplatz im Kanton Appäzäll ahcho. Döt simmer vom Kurt-Michael-HR Aeschbacher mit dä Kutschä (Alpätaxi) abgholt worde. Dä Herr Aeschbacher hät us än spannändä Iblick vom schöne Appäzäll gäh und viel verzellt. Währänd därä gmüätliche und trinkfreudigä Fahrt hämmer churz i dä Loosmühli ghaltet. Döt hämmer üsi Ruckseck chönä deponiere, da mir zObig döt gschlofe händ. Somit häts au Cornelia na gschafft bis uf Appäzäll und mir händ si am Bahnhof Weissbad chöne abhole. Skigebiet vo Appäzäll und dä frei Fall vo dä Cornelia sind zum Witz-Evergreen vo dä Kutschefahrt worde. Aschlüssänd simmer mit dä Velos losgfahre vo Appäzäll über Gonten, Gontenbad nach Jakobsbad wo mir trotz nasser Füürstell äs Fürli ahnebrocht händ zum grilliere. Au döt häts ä feins Glas Wy möge liede. Mir sind aber nid älei gsi. Di ander Gruppe us Rickenbach Luzern hät dä Kathrin Schoggi gäh fürs Föttelä und dä Baba äs kochäds Ei. Nach äm nä glattä Mittagstisch simmer wieter mit dä Velos bis uf Hundwil. Döt hämmer chönä feine Appäzäller-Biber sälber bachä. So hämmer üs wieder uf Drahtesel gschwunge richtig Appäzäll. Döt hämmer dän na eis zwei Turte-Bödeli-Föteli gmacht. Nach däm mir dVelos wieder abgäh händ und dä Bahnschaltermaa vom stügälä au wieder ufgstande isch, simmer na dur Appäzäll glofä. Eis, zwei Polteröbäd sind au na gsi. Mir händs dän aber bis id Alpäbitter gschafft, wo üs dFrau Sonderer scho erwarted hät. Än 20-minütige, ermüädändä Film hät üs über dä Alpäbitter informiert. Nachäm Rundgang durd Firma händ mir no verschiedenes dörfe degustiere. Alles isch alläs probiert worde, bis uf dä Enzian, dä segi nid so vorteilhaft voräm Ässä. Spöter simmer go dSusanne am Bahnof abhole und denn Richtig Restaurant glofe zum go Znachtässä. Voräm Dessert hämer na mit äm Walter üsi Vogelstimmli trainiert und schlussendlich tatsächlich än Jodel inkl. Talerschwinge ufd Bei gsellt. Nach üsäm glamurösäm Uftritt im Restaurant vor Publikum hämmer wieder Platz im Buch gha für dä Dessert. Heissi Öpfel mit Vanilleglace. Hei simmer zFuäss. D’Wirtin hät üs usführlich erchlährt wo dure: Nizzi bi dä Gabelig und bim Gringel verbi. Nacherä ziet laufe hämmer dän üsi Underkunft erreicht. Nacherä, für die einte eher unruhige Nacht hämmer en mega feine Beck-Zmorge gnosse und und sind dän mit üsäm Lunchpaket zum Bahnhof Weissbad glofe. Nach däm mir dMaja verabschiedet händ häts gheisse, mir mösid jetzt is Poschtauto richtig Brüllisau istige. Döt simmer na frisch und munter losglofe richtig Sämtisersee. Di ersti Wyfläsch isch nach däm happigä Wäg bi viel Rägä im Schärmä trunke worde. Aber dStimmig isch trotz äm Rägä nid dä Bach ab und munter simmer witer gwanderet. Vom Plattäbödeli us hämmer strängi 1 ½ Stund möse überstah und sind dän ufäm Staubern ahcho. Da Picknick verbote gsi isch, hämmer üs zwüschäd Ässä oder Ufwärmä müäsä entscheidä. Mir sind dän is Reschti und händ ä warms Getränk gnossä. Doch dä Gschmack vo dä feinä Rösti hät üs na viel meh hunger gäh. So simmer nach äm Umziäh wieder loszogä und händ üsi feine Sandwich halt bim laufe gnosse. Und scho hät sich serste mal dSunnä zeigäd und ändlich is au mal chli gradus gangä. Bevor mir dän dä letschti steil Stutz in Agriff gnoh händ simmer namal anäghöckläd und händ us üsnä Rucksäck na ä Stärkig gnah. Bim höcklä sind über üs plötzlich zwei Bergdole umägflogä. D’Arlene isch so überrascht worde, dass sie grad im höchä Bogä vorne usägheit isch. Gstärkt simmer wieterzogä und am Schluss ali als Sieger ufäm höchä Chastä ahcho. Pflotschnass hämmer üs statt für Trottinett fürs Drehrestaurant entschiede. So händ mir üs äs letschtimal umzoge und Baba hät na dä Hometrainer ahgleit. Kunterbund gkleidet simmer dän mit dä Chastäbahn durab und ufs Poschtauto. Ufäm heiwäg isch namal richtig Poscht abgangä. Cornelia hät tatsächlich na ihre Matthias kännäglärnt und Wii isch au na rächt gflosse. Mir händ ja schliässlich üsä Fläschäkönig müäsä fierä!! Mit jodlä, trinkä und viel lachä simmer dän zWinti ahcho. Tamara, Anita und Cornelia händ üs sogar na bis i di letscht Minute in Zug begleited. Vor luter Abstimmig, was mit dänä 30 Frankä passiert, hämmer üsi 3 Gspöndli bim winkä eifach ignoriert. Schlussändlich hämmer dä Fläschäkönig versänkt und diä 30.00 Franken verschänkt. Für was diä 30.00 Frankä investiert worde sind, isch und bliebt üsäs Gheimnis.      

(Faltbericht geschrieben von allen Turnfahrerinnen)